தீப்பெட்டி தொழிலின் வரலாறு:

தீப்பெட்டி தொழிலின் வரலாறு:

தீப்பெட்டித் தொழிலை முதன் முதலில் இங்கு வந்த வரலாற்றுப் பின்னணியையும் நாம் கொஞ்சம் தெரிந்து கொள்வது மிகவும் நல்லது.

விருதுநகர்; மாவட்டம் சாத்தூர், சிவகாசி பகுதிகளில் மழை அதிகம் பெய்யாததால் விவசாயம் அருகி, மக்கள் மிகவும் கஷ்டப்பட்டுக் கொண்டிருந்த நேரம். வெயிலுக்கு மட்டும் பஞ்சமில்லை. இனி இப்படியே காலம் தள்ள முடியாது என்ற நிலை வந்தபோதுதான் தீப்பெட்டித் தொழில் இங்கு உதயமானது.

கல்கத்தா நகரில் எம்.ஜி.நந்தி என்பவர், கையினால் தீப்பெட்டி செய்யும் முறைகளை விரும்புவோருக்கு கற்றுக் கொடுத்தார். அப்போது சிவகாசியிலிருந்த திரு.ப.அய்யநாடார் அவர்களும், திரு.ஏ.சண்முக நாடார் அவர்களும் கல்கத்தா சென்று தீப்பெட்டி செய்யும் முறைகளை நன்றாகக் கற்றுணர்ந்து சிவகாசி திரும்பினார்கள். சிவகாசியில் தீப்பெட்டித் தொழில் துவங்கப்பட்டது. பின்னர் அத்தொழில் பெருமளவில் முன்னேறி சாத்தூர், கோவில்பட்டி மற்றும் சுற்றுவட்டார ஊர்களிலும் தொழிற்சாலைகள் துவங்கப்பட்டன. அதன் மூலம் மக்கள் வேலை வாய்ப்புகளைப் பெற்றார்கள்.

தமிழகத்தில் விருதுநகர், தூத்துக்குடி, திருநெல்வேலி, வேலூர், தருமபுரி ஆகிய மாவட்டங்களில் 300 பகுதியளவு இயந்திரத் தொழிற்சாலைகள், 25 முழு இயந்திர தீப்பெட்டித் தொழிற்சாலைகள் இயங்குகின்றன. இவற்றின் மூலம் சுமார் 4 லட்சம் தொழிலாளர்கள் நேரடியாகவும், 2 லட்சம் தொழிலாளர்கள் மறைமுகமாகவும் வேலை பெற்று வருகின்றனர். அதே நேரத்தில் தமிழகத்திலுள்ள தீப்பெட்டி ஆலைகளில் தினமும் 2 லட்சம் தீப்பெட்டி பண்டல்கள் தயாரிக்கப்பட்டு வடமாநிலங்களுக்கு அனுப்பப்படுகின்றன. இத்தொழிலில் 90 சதவீதம் பெண்களே உள்ளனர்.

Related posts

Leave a Comment