Day: February 8, 2021

தளவாய்புரம் : தளவாய்புரம் பகுதி விசைத்தறி கூடங்களில் கைத்தறியில் உற்பத்தி செய்யக்கூடிய சேலைகளைசட்ட விரோதமாக நெய்யப்படுவதாக வந்த புகாரை தொடர்ந்து கைத்தறி அமலாக்க உதவி சட்ட அலுவலர் திருவாசகம் தலைமையிலான அதிகாரிகள் ஆய்வு மேற்கொண்டனர். தளவாய்புரம் செனாய் நகர் கக்கன் தெருவை சேர்ந்த முருகன் 40, கைத்தறி சேலை உற்பத்தி செய்வது கண்டு பிடிக்கப்பட்டது.அவர் மீது தளவாய்புரம் போலீசார் வழக்குப் பதிவு செய்தனர்.

சேத்துார் : ”மன அழுத்தத்தை தீர்க்கக்கூடிய ஆணி வேரே கிராமம்தான் ,’ என, தென் மண்டல ஐ.ஜி., முருகன் பேசினார். ராஜபாளையம் அருகே சேத்துார் அன்னை மன நல மருத்துவமனை வளாகத்தில் நடந்த ‘மனம் பிட்’இணையதளம் துவக்க விழாவில் அவர் பேசியதாவது: ஆரோக்கியமான மனநிலை, ஆரோக்கியமான வாழ்க்கையை கொண்டதாக இந்த இணையதளம் துவக்கப்பட்டுள்ளது. கிராமிய உணர்வோடு கிராமத்தில் துவங்கப்பட்டுள்ள இந்த இணையதளம் பலருக்கு தீர்க்கப்படாத பிரச்னைகளை தீர்க்கக் கூடியதாக இருக்கும். மன அழுத்தத்தை போக்கக்கூடிய ஆணிவேரே கிராமம் தான். கிராமத்து உறவு தொன்றுதொட்டு வருவதாக திருமூலர் தெரிவித்துள்ளார். நேற்றைய பொழுதை விட இன்றைய பொழுது மிக அருமை என்பது குறித்து சிந்தியுங்கள், என்றார். சி.இ.ஓ., ராஜநாராயணன், டாக்டர்கள் அனந்தகிருஷ்ணன், புதிய ராஜ், தொழிலதிபர் சந்திரன்ராஜா பேசினர். டாக்டர் அர்ஜூனன் நன்றி கூறினார்.