தேர்தல் பிரசாரத்தில் சிறுவர்களை ஈடுபடுத்துவதை.. தடுத்து நிறுத்துங்க!

விருதுநகர் : மாவட்டத்தில் தேர்தல் நன்னடத்தை விதிகளை மீறி அரசியல் கட்சியினர் தேர்தல் பிரசாரத்திற்காக சிறுவர், சிறுமியரை பயன்படுத்தி வருவது அதிகரித்துள்ளது. கட்சியனரின் விதிமீறல்களால் குழந்தைகளின் கல்வி பாதிப்படைகிறது. விதிகளை மீறுவோர் மீது மாவட்ட தேர்தல் அலுவலர் வழக்குப்பதிவு செய்ய வேண்டும்.

தேர்தல் நன்னடத்தை விதிகளின் படி தேர்தல் பிரசாரம், பொதுக்கூட்டம், ஊர்வலங்களில் 18 வயதுக்கு உட்பட்ட சிறுவர், சிறுமியரை ஈடுபடுத்தக்கூடாது. மீறும் கட்சி நிர்வாகிகள் மீது வழக்குப்பதிவு செய்ய தேர்தல் கமிஷன் உத்தரவிட்டுள்ளது. மாவட்டத்தை பொறுத்தமட்டில் தேர்தல் விதிகளை முக்கிய கட்சிகள் பின்பற்றுவதில்லை. வழக்கம் போல் பிரசாரம், பொதுக்கூட்டம், ஊர்வலங்களில் சிறுவர்களை பயன்படுத்துவது தொடர்கிறது.

டூவீலர்களில் சென்று துண்டு பிரசுரங்களை வீடு வீடாக சென்று விநியோகிக்கும் பொறுப்பு சிறுமிகளிடம் வழங்கப்பட்டுள்ளது. ஆபத்தை உணராமலும், ஹெல்மெட் அணியாமலும் அப்பாவி சிறுமிகள் டூவீலர்களில் சென்று சுட்டெரிக்கும் வெயிலில் வீடு வீடாக சென்று துண்டு பிரசுரங்களை விநியோகித்து வருகின்றனர். ஆயிரம் துண்டு பிரசுரங்களை விநியோகிக்கும் சிறுமிகளுக்கு கூலியாக ரூ.100 மட்டும் வழங்கி கட்சியினர் மோசடி செய்கின்றனர்.

நடவடிக்கை பாயுமா

சிறுவர், சிறுமியர், குழந்தைகளை தேர்தல் பிரசாரத்தில் ஈடுபடுத்துவது கூடாது என தெரிந்தும் பெரும்பாலான கட்சியினர் விதிகளை பின்பற்றுவது கிடையாது. பள்ளிக்கு விடுமுறை விடப்பட்டுள்ளதால் சிறுவர், சிறுமியரை தேர்தல் பணியில் ஈடுபடுத்துவது கட்சியினருக்கு சுலபமாக உள்ளது. சிறிய தொகை வருவாயாக கிடைப்பதால் பெற்றோரும் கண்டு கொள்வதில்லை. இதை தடுத்தும், சிறுவர்களை தேர்தல் பணியின் ஈடுபடுத்துவோர் மீதும் குழந்தை தொழிலாளர் சட்டப்படி வழக்குப்பதிவு செய்ய மாவட்ட தேர்தல் அலுவலர் நடவடிக்கை எடுக்க வேண்டும்.ராஜராஜன், சமூக ஆர்வலர், விருதுநகர்.

Related posts

Leave a Comment